Azərbaycan Texniki Universitetinin (AzTU) nümayəndə heyəti universitetin fəxri məzunu "Baku Steel Company" MMC-nin vitse-prezidenti Ramin Kərimovla onun iş yerində görüşüb.
Ramin Kərimovun uğurlu karyerası “Baku Steel Company”də ilk olaraq poladəridən köməkçisi vəzifəsindən başlayıb. Sonralar poladəridən, poladəritmə sexində növbə rəisi, şixta tədarükü sahəsində baş inspektor, şixta tədarükü sahəsinin rəisi, poladəritmə sexinin rəisi, istehsalat direktoru vəzifələrində çalışıb.
Hazırda "Baku Steel Company" MMC-nin vitse-prezidentidir.
Ramin Kərimov 2016-cı ildən indiyə kimi tutduğu vəzifə üzrə şirkətin gələcək inkişafı və yekun məhsulun istehsal xərclərinin azaldılması üçün geniş strategiyalar həyata keçirib. Onun apardığı uğurlu islahatların nəticəsi olaraq, zavodda rekonstruksiya və avtomatlaşdırma işlərinin aparılması nəticəsində illik istehsal gücünü 35%, yəni 350 min tondan 1.000.000 tona qədər artırılıb. Tamamlanan yenidənqurma işlərinə daxil olan yeni Elektrik Qövs Sobasının (EQS) quraşdırılması, soba-çalovun, yeni FKQ (Filter Kompensasiya Qurğusu) ilə birlikdə yarımstansiyanın quraşdırılması və bütün köməkçi avadanlıqların yeni məhsuldarlıq gücünə uyğun olaraq dəyişdirilməsi-modernizasiyası, həmçinin soba üçün 60 MVA gücündə yeni transformator və reaktor alınıb, quraşdırılıb. Onun rəhbərliyi ilə məhsuldarlığı 5000 Nm3/saat olan yeni oksigen zavodu tikilib, əritmə prosesində HBI/DRI kimi materiallardan istifadəni 30% -dən 80% -dək artırmaq üçün İtaliyanın “Danieli” şirkətinin istehsalı olan, yeni dənəvari materialların sobaya verilməsi sistemi (MHS) quraşdırılıb. EQS-də odadavamlı materialların davamlılığı 750 ərintidən 1200 ərintiyə qədər artırılıb. Azərbaycanda ilk dəfə olaraq “Baku Steel Company”MMC-nin 2-ci poladəritmə sexində diametri 130 mm-dən 220 mm-dək olan dairəvi boru pəstahları istehsalı onun rəhbərliyi ilə başlanılıb və bu pəstahlardan keyfiyyətli tikişsiz boruların istehsalı üçün “Azərboru” ASC-də rekonstruksiya işlərinin aparılmasında yaxından iştirak edib. Hazırda zavodda dairəvi və kvadrat pəstahların istehsalı üçün müasir, 4 şırnaqlı yeni Fasiləsiz Pəstah Tökmə Maşını (FPTM) və vakuumator qurğuları quraşdırılır. Eyni zamanda yeni yayma xəttinin (yüksəksürətli çatdırılma texnologiyası ilə bir sıralı yayma xətti) quraşdırılması üçün tender sənədləri və texniki göstəricilər hazırlanıb.
Ramin Kərimov həm də BƏƏ-nin Fujairah şəhərində yerləşən, illik istehsal gücü 1 milyon ton olan United Steel Industries FZC metallurgiya zavodunun tikinti işlərinə rəhbərlik edib, eyni zamanda zavodun icraçı direktoru vəzfəsində çalışıb.
Azərbaycanda ilk dəfə ferroərintilər zavodunun tikilməsi ideasını da məhz Ramin Kərimov irəli sürüb. Metallurgiya zavodlarında istifadə olunan FeSi 75 (Ferrosilisium) istehsal edən zavodun Türkiyənin “Demora” şirkətinin mütəxəssisləri ilə birlikdə inşaat layihəsinə də rəhbərlik edib. Hazırda zavodun məhsulları ABŞ, Almaniya, Yaponiya, Türkiyə və bir çox ölkələrin nəhəng metallurgiya zavodlarına satılır.
2013-cü ilin yanvarından AzTU-da metallurgiya ixtisası üzrə dövlət attestasiyası komissiyasının sədri, 2015-ci ildən AzTU-nun dosentidir. Həmçinin 2016-cı ildən Azərbaycan Dövlət Neft və Sənaye Universitetində maşınqayırma və materşünaslıq ixtisası üzrə dövlət attestasiyası komissiyasının sədridir.
2013-cü ilin iyununda Almaniyada “Excellence in Steelmaking 2.0” devizi altında keçirilən V Beynəlxalq Metallurgiya Simpoziumunda, 2014-cü ilin aprelində Abu Dabidə keçirilən II Ümumdünya DRI və Pellet Konqresində, 2019-cu ilin martında isə Russiyanın Novokuznetsk şəhərində “Materialşünaslıq və maşınqayırma texnologiyası” mövzusunda keçirilən III Beynəlxalq Konfransda çıxış edib.
2017-ci ildə “Bimetallik yayma valın işçi hissəsi üçün çuqun” adlı ixtirasına görə patent alıb.
2016-cı ildə Azərbaycan Respublikasının Prezidenti yaynında Elmi İnkişaf Fondunun təşkil etdiyi Elmin İnkişafı Fondunun elan etdiyi “Fundamental və tətbiqi xarakterli elmi-tədqiqat layihələri” adlı qrant müsabiqəsinin qalibi olub.
Ramin Kərimov qeyri-üzvi kimya və metallar mövzusunda 54 adda elmi məqalənin müəllifidir.
2018-ci ildə isə “Fasiləsiz Tökmə Pəstahları” adlı monoqrafiyası nəşr olunub.
Kimya elmləri üzrə fəlsəfə doktorudur. 2020-ci ilin fevralında AzTU-da texnika elmləri doktoru dərəcəsi almaq üçün disertasiya müdafiə edib.
İngilis, alman, rus və türk dillərini mükəmməl bilir.
turan.info.az
.
Muəllif huquqları qorunur. Məlumatdan istifadə etdikdə istinad mutləqdir.
