ASLAN ÇIRPANLI VƏFAT EDİB

Xatırladaq ki,
Aslan Çerpanlı (Çerpanov) - 1947-ci ildə qədim Borçalı mahalının Başkeçid (indiki Gürcüstanın Dmanisi) rayonundakı ən ucqar və ən böyük ellərimizdən olan Yırğançay kəndində el ağsaqqalı, Gürcüstanın Əməkdar müəllimi İdris Çerpanovun ailəsində dünyaya göz açıb.
1969-cu ildə Həsən bəy Zərdabi adına Gəncə Dövlət Pedaqoji İnstitutunu bitirib.
Elə həmin vaxtdan da doğulduğu kənddə müəllim işləyib.
O, uzun müddət Yırğançay kənd orta məktəbinin direktoru vəzifəsində şərəf və ləyaqətlə çalışıb.
Dəfələrlə Fəxri fərman və Təşəkkürnamələrlə təltif olunub.
Şerləri və məqalələri müntəzəm olaraq dövri mətbuatda və almanaxlarda işıqüzü görüb.
Ailəli idi, dörd övladı var.

Biz bir daha Ulu Tanrıdan Aslan müəllimə rəhmət diləyir və aşağıda onun bir neçə şeirini dəyərli oxucularımıza ərmağan edirik.

Boyük hörmət və ehtiramla
Müşfiq BORÇALI,
ZiM.Az


ANA SEVGISI

Həyat başdan-başa sevgidir, ancaq,
Hər şeydən öncədir ana sevgisi.
Vətən də anadir halal insana,
Yaranandan keçir qana sevgisi.

Əlində var-dövlət ola, şirindir,
Dostlarin əbədi qala, şirindir,
Anadan olan tək bala şirindir,
Əbədi yeriyir cana sevgisi.

Aslan, ozan sazi mərdə çalibdir
Dünyani düşünmək mərdə qalibdir.
Məni bir çarəsiz dərdə salibdir,
Hələ ovlanmamiş sona sevgisi.


YARAŞMAZ

Zər qədrini zərgər bilər dünyada,
Qumar üçün zər, kişiyə yaraşmaz.
Arxadan danışmaq, quyruq bulamaq,
Papaq qoyan ər kişiyə yaraşmaz.

Mərd igidə arxa olar öz eli,
Saxlayaramı bünövrəsiz bənd seli?
Pələng nərildəsə titrədər kəli,
Nərə çəkmək boz pişiyə yaraşmaz.

Əzəlimiz sudu, sonumuz torpaq,
Bizdən hesab sorar bir quru yarpaq.
El-oba önündə dinib-danışmaq,
Aslan, bil, ki, hər kişiyə yaraşmaz.


YIRĞANÇAY

Zəmanənin dönüklüyü üzündən
Təklənib dağlarda qaldı Yırğançay.
Buradan başlayır ulu Borçalı,
Düşmənin gözündə dağdı Yırğançay.

Bir yanı Lorudu -yağıya verdik,
Bir yanı Əyriqar - zahıya verdik.
Bir yanı ormandı - barını dərdik,
Dağların qoynunda bardı Yırğançay.

Hər yandan görünür Noylunun dağı,
Köksündən qaynayır Orta bulağı,
Bakıdan, Gəncədən gəlir qonağı,
Eşidin, ay ellər, sağdı Yırğançay!

Aslana əzizdi torpağı, daşı,
Payızda küləyi, yazda yağışı,
Yayda cənnət olur dağların başı,
Uzun qışda bəyaz qardı Yırğançay.

«Şərqin səsi» qəzeti, 07 (203). Noyabr, 2007.


(Bax:Müşfiq BORÇALI. "Sazlı-Sözlü Başkeçid",
III cild, Bakı, 2015, səh.267-269)

ZiM.Az


.
.