Bu ananın əllərindən öpən generalı tanımıram. Yalnız şəklini görmüşəm.
Qarabağ uğrunda
şəhid olan bir oğulun
anasının qarşısında
generalın başını əyərək
ananın əllərindən öpməsi
bütün qəhrəman,
müqəddəs anaların
qarşısında onlara olan
sevginin, məhəbbətin
səmimi etirafıdır!
Qəlbində Qarabağ,
torpağ ağrısı,
Şəhid dərdlərini daşıyır hələ.
Dərdli anaların dərdinə şərik,
Yaxşı ki, oğullar yaşayır hələ.
Bütün ürəklərin ağrısı torpaq,
Dil açar yurdların əsir səsində.
Bir ana laylası, Ana ağısı,
Dillənər “Qarabaq” şıkəstəsində.
Tale sınağından üzü ağ çıxan,
Nər təki bir oğul böyüdən ana.
Müqəddəs ananı, qəhrəman oğlu,
Tale bəxş eləyib Azərbaycana.
Başını çiyninə qoyub dərdinin,
Gözləri zillənər yollara sarı.
Analar qəlbində sağalmaz yara,
Bir müjdə gətirməz kənd uşaqları.
Səcdəyə, hörmətə layiq hər zaman,
Ana qarşısında diz çökən oğul.
Çiynini ananın tərbiyəsinə,
Ananın adına söykəyən oğul.
Yurdumun cəngavər, igid balası.
Özünü öymədin, öyünmədin sən.
Ana qarşısında başını əydin,
Ölüm qarşısında baş əymədin sən.
Analar ömrünü sıxar intizar,
Gözünün nurunu yollara səpər.
Şəhid məzarını bağrına basar,
Şəhid torpağını gözünə təpər.
Şəhid oğulları - boyları çinar,
Qələbə bayrağın zirvəyə qaldır.
Ana əllərindən öpən general,
Sənə də ananın südü halaldır.
Ümidi qırılmaz bu anaların,
Deyər,- təki başın sağ olsun, Vətən!
Belə oğulları böyütdüyündən,
Qoy sənin də üzün ağ olsun, Vətən!
Heç nəylə ölçülməz sənin qiymətin,
Ey odlar diyarı, ulu Vətənim,
Ana qarşısında başını əyən,
Oğul da mənimdir, ana da mənim!
Nəsib Nəbioğlu,
Moskva,
07.11.2017
REDAKSİYADAN:
turan.info.az xəbər verir ki, “Facebook” istifadəçisi erməni Haykaz Gevorkyanın öz səhifəsində “Azərbaycanlı general şəhid anasının hüzurunda. Təəssüf ki, bizdə belə deyil” başlığı ilə paylaşdığı
bu fotoda ehtiyatda olan azərbaycanlı general-leytenant Yaşar Aydəmirov şəhid anasının əlini öpür.
Qeyd edək ki, Yaşar Aydəmirovun həmin fotosu noyabrın 1-də Azərbaycan Texniki Universitetində keçirilən anım tədbirində çəkilib.
Fotoda 1997-ci ildə şəhid olan kəşfiyyatçı Anar Rzayevin anası Siyafət Rzayevaya medal təqdim edən general-leytenant Yaşar Aydəmirov ehtiram əlaməti olaraq şəhid anasının əlindən öpür və qarşısında baş əyir.
turan.info.az
.
Muəllif huquqları qorunur. Məlumatdan istifadə etdikdə istinad mutləqdir.
