Onu ilk dəfə 1986-cı ilin sentyabrın 2-də görmüşəm. Qrup uşaqlarımız Bakının hansısa bir məktəbində "passiv praktika"da idi. Ora çatanda qrup uşaqlarının arasında 2 qərib adam da gördüm: Biri bəstəboy, gözlərinin dərinliyində parlaq bir həyat işığı olan, o biri isə nisbətən hündürboy, gözlərinin dərinliklərində gizli kədər gizlənmiş sakitbaxışlı nazik bir oğlan. Eldardan (qrup nümayəndəsi) kimliklərini soruşdum. "Əsgərlikdən təzə gəliblər - dedi, - bizim qrupda oxuyacaqlar".Onlardan birinin adı Nəriman, digərinin adı Elçin idi.
Bugünkü yazım ikinci haqqındadır - Elçin haqqında.
... Hər ikisi ilə münasibətlərimiz çox tez quruldu. Nəriman qupquru (qrup içində ona Javer deyirdik. Adi zarafata da "qanun çərçivəsində" baxırdı), Elçin isə həlimtəbiət, şən, bəzən adamın "ağrıyan "köhnə" yerindən" vuran və bundan xüsusi zövq alan birisi idi. Sonralar öyrəndim ki, əsgərliyə getməmişdən az əvvəl anasını itirib. Bunu eşidəndə çox pis oldum. İnsan əsgərlikdə olanda daim anasını düşünür, onun narahat olmaması üçün "iki daşın arasında" da olsa, vaxt tapıb anasına məktub yazır. Elçin isə bu ana sevgisini, ana nəvazişini elə buradaca qoyub uzaq səfərə yollanmışdı...
Dünyanın dərdini, qayğısını özünə yük eləmədi Elçin. Düşdüyü ən çətin, ekstremal məqamlarda da onun əndəşələndiyinin şahidi olmadım. Sonda özlüyümdə bu qənaətə gəldim ki, Elçinçün dünyada "dolu şey" yoxdur, hamısı "boş şey"dir. Hətta bir dəfə qrup içərisində dedim ki, ay uşaqlar, bu Elçindən soruşun, görün dünyada nəsə "dolu bir şey var?"
Beləcə, bu zarafatlarla, bu şirin xatirələrlə ömür kitabının tələbəlik fəslini bitirdik.
...Bu gün onun doğum günüdür. 60 illik yubileyidir. Bu gün lazım olan anda yanımızda tapa bilməyəndə də giley-güzar etmirik. Bilirik ki, AzərTAC kimi hər anı, hər saniyəsi mühüm informasiyalarla dolu olan bir məkanda işləmək özü böyük məsuliyyətdir.
Elçin, səni təbrik edirəm, əzizim.
Allah ailənlə, övladlarınla birgə sənə uzun ömür, sağlam can versin.
Daim nəvələrin artan boyuna baxıb fəxarət hissi keçirəsən.
Amin.
NİMAN MƏMMƏDLİ,filolq
REDAKSİYADAN:
Biz də əziz və dəyərli Niman qardaşımızın təbrikinə qoşulur, bütün yaradıcı heyətimiz adından əziz və dəyərli qələm dostumuz, çox hörmətli Elçin Kamalı anadan olmasının 60 illik yubileyi münasibətilə ürəkdən və səmimi qəlbdən təbrik edirik, ona uzun ömür, möhkəm can sağlığı, şərəfli fəaliyyətində yeni-yeni uğurlar və daha böyük nailiyyətlər arzulayırıq!..
Müşfiq BORÇALI,
ZiM.Az
elm.info.az
.
Muəllif huquqları qorunur. Məlumatdan istifadə etdikdə istinad mutləqdir.
