Bu gün Milli Onkologiya Mərkəzində Azərbaycanın Milli Qurtuluş Gününə,
həmçinin Milli Onkologiya Mərkəzinin
nəzdində yaradılmış İnvaziv Diaqnostika
və Müalicə Şöbəsinin 5 illiyinə həsr olunmuş “İnvaziv diaqnostika və müalicə: Bu gündən sabaha” adlı konfrans keçirilib.
turan.info.az “Report”a istinadən xəbır verir ki, tədbirdə yerli həkimlərlə yanaşı, Türkiyə və Rusiyadan dəvət olunmuş tibbi mütəxəssislər də bu sahədə ən son elmi və praktiki fəaliyyətlərini paylaşıblar. Konfransda həkim və mütəxəssislərlə tibbin bu sahəsinin ən aktual məsələləri müzakirə olunub və cərrahi əməliyyat otaqlarından bir sıra əməliyyatlar da birbaşa olaraq yayımlanıb.
Konfransın sonunda iştirakçılara sertifikatlar təqdim olunub.
Tədbirdə iştirak edən həkim-endoskopist Farmiz Əliyev “Report”un suallarını cavablandırıb.
- Dünyada mədə-bağırsaq traktındakı onkoloji xəstəliklərin artım tendensiyası nə səviyyədədir?
- Ümumdünya Səhiyyə Təşkilatının məlumatına görə, dünyada onkoloji xəstəliklərin yayılma faizi artır – 1999-cu illə müqayisədə 2020-ci ildə 2 dəfə artım gözlənilir.
Lakin skrininq kolonoskopiyası və qastroskopiyasının səhiyyədə istifadəsi mədə və qalın bağırsağın erkən xərçənginin və selikli qişa xərçənginin ilkin əlamətlərinin diaqnostikasının xeyli təkmilləşməsinə yol açdı.
- Tibbdə “skrininq” terminini necə anlamalıyıq və endoskopiyada hansı müasir yanaşmalar mövcuddur?
- Səhiyyədə skrininq heç bir simptomu olmayan insan qruplarının xəstəliyi müəyyən etmək üçün müayinə edilməsi deməkdir.
Son dövrə qədər cərrahiyyə əməliyyatı nəinki erkən xərçəngin müalicəsinin, həm də mədə bağırsaq traktının iri xoşxassəli törəmələrinin qızıl standartı idi.
Lakin kiçik invaziv metodikaların inkişafı belə şişlərin, ilk növbədə, poliplərin endoskopik yolla aradan götürülməsini mümkün etdi.
Bu törəmələrin kənarlaşdırılmasının yeni yolları – endoskopik selikli qişa rezeksiyası və endoskopik seliklaltı qat diseksiyası təklif və tətbiq edilib.
Erkən mədə xərçənginin endoskopik yolla kənarlaşdırılması barədə məlumatı ilk dəfə 1974-cü ildə yapon alimləri yayıb. M.Tados 1984-cü ildə digər müəlliflərlə birgə endoskopik selikli qişa rezeksiyası (EMR – endoscopicmucosalresection - red.) adlanan, mədə bağırsaq traktının epitelial törəmələrini kənarlaşdırmağa imkan verən yeni metodikanı hazırladılar. Bu metodika nəinki polipformalı, həm də qeyri-polipformalı törəmələri kənarlaşdırmağa imkan verir.
Endoskopik seliklaltı qat diseksiyası (ESD – endoscopicsubmucosaldissection- red.) mədə bağırsaq traktı xərçənginin kənarlaşdırılmasının ən yeni, “gənc” texnologiyasıdır.
- Pasiyentlərin sağ qalma göstəriciləri nə qədərdir?
- Mədə-bağırsaq traktında törəmə olan pasiyentlərin sağ qalma göstəriciləri diaqnozun qoyulma anındakı patoloji prosesin səviyyəsindən asılıdır. Həzm sistemindəki onkoloji patologiyaların və ilkin xərçəng formalarının erkən mərhələdə aşkarlanması müasir tibbin qarşısında duran mühüm məsələlərdən biridir.
Endoskopist həkimin prioritet məsələlərindən biri də yeni tibb texnologiyalarının diaqnostikada və müalicədə tətbiqinə bağlıdır.
Samirə Abdullayeva
REDAKSİYADAN:
Farmiz Şamil oğlu Əliyev - 1972-ci il oktyabrın 19-da qədim Borçalı mahalında, indiki Gürcüstanın Başkeçid (indiki Dmanisi) şəhərində anadan olub. Əslən Bolnisi rayonunun Darvaz kəndindəndir.
1989-cu ildə 1 saylı Dmanisi orta məktəbini rus dilində bitirib.
Fortepiano üzrə musiqi təhsilini 1979-1986-cu illərdə Dmanisi orta musiqi məktəbində alıb.
1990-cı ildə Tümen Tibb İnstitutuna daxil olan Farmiz 1996-cı ildə artıq Tümen Tibb Akademiyası adlanan ali təhsil ocağının müalicə fakültəsini bitirib.
1997-1998-ci illərdə terapiya üzrə internaturanı Tbilisi Dövlət Tibb Universitetində keçib.
1999-cu ildə Tümen Tibb Akademiyasının Həkimlərin Təkmilləşməsi fakültəsində “Endoskopiya” ixtisası üzrə ilkin ixtisaslaşıb.
2001-2003 illərdə qiyabi olaraq hüquq üzrə ikinci ali təhsilini Tbilisinin biznes və marketinq institutunun hüquq fakültəsində alıb.
2017-ci ildə “Endoskopiya” ixtisası üzrə Moskva şəhərində yerləşən Piroqov adına Milli tibbi-cərrahiyyə Mərkəzində ixtisaslaşma kurslarına qoşulub.
Moskvadanın Piroqov adına Milli tibbi-cərrahiyyə Mərkəzində tibb üzrə fəlsəfə doktoru elmi dərəcəsi almaq üçün dissertasiya işi üzərində işləyir.
Əmək fəaliyyətinə 1989-cu ildə Rusiyanın Tümen Tibb Akademiyasının ümumi biologiya və genetika kafedrasında laborant vəzifəsində başlayıb.
1999-2012-ci illərdə Tümen Dövlət Universitetinin tibbi klinikasında endoskopist həkim vəzifəsində çalışıb.
2012-ci ildən Bakının Nəsrəddin Tusi adına klinikasında endoskopist həkim kimi çalışır.
Dəfələrlə Türkiyə, Gürcüstan, Avstriya, İtaliya, Rusiya kimi ölkələrdə təşkil edilən seminar və konfranslarda iştirak edib.
Rus, Azərbaycan və gürcü dillərini mükəmməl bilir.
Evlidir, iki övladı var.
turan.info.az
.
Muəllif huquqları qorunur. Məlumatdan istifadə etdikdə istinad mutləqdir.
