Oktyabrın 25-də AMEA-nın Nizami adına Ədəbiyyat İnstitutunun və Mərkəzi Elmi Kitabxananın birgə təşkilatçılığı ilə “Macarıstan türkologiyası və Azərbaycan” mövzusunda konfrans keçirildi.Tədbir Prezident İlham Əliyevin “Birinci Türkoloji Qurultayın 90 illik yubileyinin keçirilməsi haqqında” 18 fevral 2016-cı il tarixli Sərəncamı və AMEA Rəyasət Heyətinin 20 aprel 2016-cı il tarixli Qərarına əsasən Macarıstan Elmlər Akademiyasının həqiqi üzvü Georq Hazainin xatirəsinə həsr olunub.
AMEA Rəyasət Heyətinin aparatının İctimaiyyətlə Əlaqələr və Elmin Populyarlaşdırılması İdarəsinin İctimaiyyətlə əlaqələr şöbəsindən turan.info.az-a bildiriblər ki, əvvəlcə tanınmış türkoloq-alim Georq Hazainin şəxsi kitab kolleksiyasından ibarət sərgiyə baxış keçirildi.
Tədbirdə AMEA-nın vitse-prezidenti, akademik İsa Həbibbəyli “Birinci Türkoloji Qurultayın 90 illik yubileyinin keçirilməsi haqqında” Prezident İlham Əliyevin Sərəncamını xatırladaraq, yubiley ərəfəsində bu konfransın xüsusi əhəmiyyət daşıdığını vurğuladı. O, Azərbaycan xalqının mədəni həyatında müstəsna rol oynayan Türkoloji Qurultaya dair yekun tədbirin bu ilin noyabr ayında təşkil olunacağını bildirdi.
AMEA-nın vitse-prezidenti Türkiyə, Qazaxıstan, Qırğızıstan və Özbəkistandan olan şərqşünas və türkoloq alimlərin iştirakı ilə AMEA-da Türkoloji Qurultayla bağlı bir çox tədbirlərin keçirildiyini nəzərə çatdırdı. Türkiyədə birinci Türkoloji Qurultayın 90 illiyinə həsr olunan beynəlxalq simpoziumda iştirak etdiyini söyləyən akademik İ.Həbibbəyli tədbir çərçivəsində Türkoloji Qurultay dövründə çəkilmiş filmin nümayiş olunduğunu bildirdi.
Azərbaycan-Macarıstan ədəbi əlaqələrindən söz açan AMEA-nın vitse-prezidenti türkologiyanın inkişafında macar alimlərin rolunu xüsusi vurğuladı, konfransın ölkələrimiz arasında münasibətlərin və elmi əlaqələrin inkişafına mühüm töhfə verəcəyinə əminliyini bildirdi.
Akademik, həmçinin türkologiya elmin inkişafında böyük xidmətləri olan G.Hazainin həyat və yaradıcılığı barədə məlumat verdi, Macarıstanda türkologiyanın keçdiyi zəngin tarixi yoldan danışdı. G.Hazainin yeni dövr Avropa türkologiyasının atası sayıldığını deyən İ.Həbibbəyli alimin türkologiya elmi sahəsindəki xidmətlərinin bir tədqiqat institutunun elmə verdiyi töhfələrə bərbər olduğunu vurğuladı.
Macarıstanın Azərbaycandakı fövqəladə və səlahiyyətli səfiri İmre Laslotski ölkələrimiz arasındakı dostluq və qardaşlıq münasibətlərindən söz açdı, tədbirin türkologiyanın, türkoloji əlaqələrin inkişafına, formalaşmasına, nəticə və perspektivlərinə mühüm töhfə verəcəyini bildirdi.
Mərkəzi Elmi Kitabxananın direktoru, tibb üzrə fəlsəfə doktoru Leyla İmanova kitabxanada saxlanılan Hazai kolleksiyasının dünya kitabxana-informasiya məkanına inteqrasiyası barədə çıxış etdi. Bildirdi ki, Azərbaycanı dünyada əhəmiyyətli türkologiya mərkəzi hesab edən macar alimi öz şəxsi kitabxanasının türkologiyaya aid bölümünün bir hissəsini AMEA-nın Mərkəzi Elmi Kitabxanasına bağışlayıb. L.İmanova bu ilin mart ayında kitabxanada türkoloq-alimə məxsus olan şəxsi kitab kolleksiyasının təqdimatının keçirildiyini də diqqətə çatdırdı. Bildirdi ki, yaxın müddət ərzində bir çox türkdilli mənbələr kataloqlaşdırılıb İnformasiya Resurs Mərkəzində saxlanılır. Daha sonra MEK rəhbəri Azərbaycanda olan türkdilli mənbələrdə ədəbiyyatların kataloqlarının birləşdirilərək vahid kataloqun yaradılması barədə təklifini irəli sürdü. Konfransda iştirak edən xarici elmi təşkilat və səfirlik nümayəndələrinə vahid kataloq ideyasını təbliğ etməklə bağlı müraciət etdi.
Tədbirdə Azərbaycanın Macarıstandakı səfiri Vilayət Quliyev, Azərbaycanda Atatürk Mərkəzinin müdiri, AMEA-nın müxbir üzvü Nizami Cəfərov, Ədəbiyyat İnstitutunun direktor müavini, filologiya üzrə elmlər doktoru Məmməd Əliyev, institutun şöbə müdiri, filologiya üzrə elmlər doktoru Asif Rüstəmli və başqaları çıxış edərək böyük türk düşüncə sahibi G.Hazainin keçdiyi zəngin tarixi yoldan danışdılar. Azərbaycan və macar xalqları arasında elmi əlaqələrin bundan sonra da möhkəmləndirilməsi baxımından konfransın əhəmiyyətini vurğuladılar.
Sonda alimin qızı Sisilya Hazai atasının Azərbaycanla bağlı xatirələrini G.Hazainin özünün memuarında yazdığı kimi konfrans iştirakçılarının diqqətinə çatdırdı. Xanım Sisilya böyük türkoloqun xatirəsinə göstərilən diqqətə görə tədbirin təşkilatçılarına minnətdarlığını bildirdi.
.
Muəllif huquqları qorunur. Məlumatdan istifadə etdikdə istinad mutləqdir.
