Müstəqil Azərbaycanın mövcudluğuna görə məhz Heydər Əliyevə borcluyuq!...
Dekabrın 11-də Azərbaycan Texniki Universitetində (AzTU) Ümummilli lider Heydər Əliyevin xatirəsinə həsr olunmuş tədbir keçirilib.
Tədbir iştirakçıları əvvəlcə Ulu öndərin Universitetin foyesində ucaldılmış büstü önünə təzə-tər gül-cicək dəstələri düzüblər, Ümummilli liderin əziz xatirəsini ehtiramla yad ediblər.
Tədbiri AzTU-nun rektoru, əməkdar elm xadimi, professor Havar Məmmədov giriş sozü ilə açıb və bütün işrirakçılar bir dəqiqəlik sükutla Ümummilli liderin əziz xatirəsini ehtiramla yad ediblər.
AzTU-nun rektoru, professor Havar Məmmədov çıxışına davam edərək, müasir müstəqil Azərbaycan dövlətinin memarı və qurucusu, xalqımızın ümummilli lideri Heydər Əliyevin şərəfli ömür yolundan, hər kəsə nümunə olacaq fəaliyyətindən, Azərbaycan xalqı və dövləti qarşısındakı müqayisəedilməz xidmətlərindən, Azərbaycanın müstəqilliyi uğrunda apardığı mübarizədən və onun hakimiyyəti illərində təhsil, səhiyyə, mədəniyyət, iqtisadiyyat sahələrinin inkişafından danışıb. Rektor bildirib ki, Ulu Öndər tarixin çətin və kəşməkəşli yollarında xalqını ciddi sınaqlardan uğurla çıxarıb, zəhməti, zəkası, fitri istedadı ilə Azərbaycan Respublikasının dünya birliyində özünə layiqli yer tutmasına zəmin yaradıb.
Rektor vurğulayıb ki, Heydər Əliyev irsində vətən sevgisi, azərbaycançılıq hissi, xalq və millət sevgisi xüsusi yer tutur. O, bunları insan üçün mənəvi əsas hesab edirdi. Azərbaycançılıq qayəsi Heydər Əliyevin nəzəri irsinin ən yüksək amalı idi.
O da qeyd edilib ki, müdrik siyasətçi Heydər Əliyev Azərbaycan tarixinin yetirdiyi ən parlaq simalardan biri, türk dünyasının və ümumiyyətlə sivil dünyanın qüdrətli şəxsiyyətidir. Zəmanəmizin diplomatiya tarixində silinməz iz qoymuş Heydər Əliyev xalqın yaddaşında ensiklopedik təfəkkürlü, dərin erudisiyalı müdrik şəxsiyyət kimi qalıb. Ulu Öndərin Azərbaycanın milli mənəvi və əxlaqi dəyərlərinin ümumbəşəri ideyalarla zənginləşməsində misilsiz xidmətləri olub. Təcrübəli dövlət başçısı və vətənpərvər bir insan kimi ulu öndər Heydər Əliyevin milli mədəniyyətimizə, mənəvi irsimizə göstərdiyi hörmət, verdiyi dəyər ictimai həyatımızın hər bir sahəsində özünü göstərmişdir.
Çıxışının sonunda professor Havar Məmmədov Ulu Öndərin açdığı cığırla addımlayan ölkə prezidenti İlham Əliyevin diqqət və qayğısı nəticəsində Azərbaycanın bütün sahələrində naliyyətlər əldə olunduğunu, Respublikada əsaslı quruculuq işlərinin aparıldığını qeyd edib və Azərbaycan gəncləri təhsillərini dünyanın mötəbər universitetlərində davam etdirdiklərini bildirib.
AzTU-nun “İctimai fənlər” kafedrasının müəllimi, dosent Əyyub Kərimov “Heydər Əliyevin həyatı bəşəriyyət üçün nümunədir” adlı məruzəsi dinlənilib. Məruzədə Ulu öndərin xalqın iqtisadi və sosial problemlərinin aradan qaldırılmasında göstərdiyi xidmətlərindən söhbət açılıb, Heydər Əliyevin siyasəti sayəsində bu gün Azərbaycanın qabaqcıl ölkələr sırasında olunduğu qeyd olunub və Heydər Əliyev irsinin öyrənilməsində gənclərin rolu xüsusilə vurğulanıb.
Daha sonra Universitetin Tələbə Həmkarlar İttifaqı Komitəsinin sədr müavini Leyla Abbaslı tələbələr adından çıxış edərək Heydər Əliyevin Azərbaycan gəncliyi üçün gördüyü işlərdən danışıb və onun həyatının bu günkü gənclər üçün nümunə olduğunu bildirib.
Tədbirdə Ümummilli liderin həyat yoluna həsr olnmuş
videofilm də nümayiş olunub.
Müşfiq BORÇALI,
AzTU - "Ziya" qəzetinin Baş redaktoru.
.
Muəllif huquqları qorunur. Məlumatdan istifadə etdikdə istinad mutləqdir.
