“Binəqədi məhkəməsinin ədalətli qərar çıxaracağına inanırıq!”

Bir qrup Azərbaycan vətəndaşı zərərçəkmiş qismində redaksiyamız müraciət ünvanlayaraq bildirirlər ki,
“dünən - may ayının 22-də Baş Prokurorluğun vəsadəti əsasında 30-a yaxın Azərbaycan vətəndaşının milyonlarla pul vəsaitini cinayətkar üsullarla ələ keçirən məşhur dələduz Qədim Ədilov Binəqədi Məhkəməsində həbs edilib. Qədim Ədilovun məhkəməyə gətirildiyini eşidən zərərçəkənlərdən 10 nəfəri məhkəmənin önünə gələrək “Binəqədi məhkəməsinin ədalətli qərar çıxaracağına inanırıq!”, “Dələduz Qədim həbs edilsin!” kimi pankartlar qaldırıb və şüarlar səslədiriblər.



Zərəçəkənlər iddia edirlər ki, dələduz Qədim Ədilova birbaşa Apelyasiya Məhkəməsinin sədri Mübariz Əkbərov himayədarlıq edir. Şirvanda məhkəmə icraçıları şöbə rəisi işləyən qardaşı Yasin Ədilov vasitəsi ilə Mübariz Əkbərovla yaxın əlaqələr quran Qədim Ədilov hətta barəsində Baş Prokurorluqda istintaq aparıldığı müddətdə belə güclü hakim himayədarlarına arxalanaraq yeni dələduzluq əməlləri törədib. 2021-ci ildə artıq 17 rəsmi zərərçəkənlə bağlı cinayət işi davam etdiyi vaxt Gəncə şəhər sakini Nəzərov Nəsrulla Cəfər oğlunun etibarından sui-istifadə edərək Qədim sonuncuya məxsus milyonlarla dəyəri olan asfalt zavodunu satacağına söz verərək etibarnamə alıb. Sonra isə ondan xəbərsiz zavodu 175000$ a sataraq aradan çıxıb. Əlavə olaraq həmin şəxsin 10 minlərlə nəğd pulunu da dələduzluq yolu ilə mənimsəyib.



2022-ci ildə İnterpol vasitəsi ilə axtarışa verilməmişdən cəmi 1-2 ay əvvəl isə Məmmədov Anar Akif oğlu və partnyorlarının 612000 azn pulunu da dələduzluq yolu ilə ələ keçirən Qədim Ədilov əvvəl Türkiyəyə qaçıb. Sonra isə Rusiyaya keçib. İnterpol xətti ilə Rusiyada həbs olunan Qədim 2024 cü ilin oktyabrında Azərbaycana təhvil verilib. Lakin Apelyasiya Məhkəməsinin sədri Mübariz Əkbərovun göstərişi ilə hakim Cavid Hüseyn onu məhkəmə zalından açıb buraxıb.



Zərərçəkənlərdən Xaləddin Yusibov, Natiq Hümbətov, Nəsrulla Nəzərov və Sadiq Cəfərov iddia edirlər ki, dələduz Qədim Ədilov və onun qardaşı Yasin Ədilov dələduzluq yolu ilə ələ keçirdikləri vəsaitdən rüşvətxor hakimlərə yaxşı “pay” ayırırlar. Yoxsa İnterpolun güclə tapıb gətirdiyi dələduzu necə zaldan buraxmaq olar? Yaxşı ki, Baş Prokurorluğun İstintaq İdarəsi ədalətli mövqe sərgiləyərək dələduzu ifşa etdi. Yoxsa daha nə qədər günahsız adam dələduz Qədim Ədilovun qurbanı olacaqdı?”

Zərərçəkənlər onu da qeyd ediblər ki, “Hətta vətəndaşların pullarını dələduzluqla ələ keçirən cinayətkar bununla doymayıb sosial şəbəkələrdən Prezidentə mütaciət edirmiş ki, neft pullarından mənə də çatmalıdır.”


.