TƏBRİK EDİRİK!...
ŞAİRİN YENİ KİTABI ÇIXIB
Məhəmmədəli Aranlı (Yadigarov Məhəmmədəli İxtiyar oğlu) - İmişli rayonunun Aranlı kəndində 2 avqust 1947-ci ildə anadan olub. 1966-cı ildə İmişli rayon 34 saylı orta məktəbi bitirib. 1973-cü ildə Azərbaycan Politexnik İnstitutunun Avtomobil nəqliyyatı şöbəsini bitirib. 1974-cü ildə hərbi xidmətdə olub. 1975-1976-cı illərdə 123 saylı texniki peşə məktəbində, direktor müavini və müəllim işləyib. 1976--1990-cı illərdə Azərbaycan melariasiya və su tikinti nazirliyinin 8-saylı avtomobil nəqliyyatı idarəsində, 1990-2002-ci illərdə isə Azərbaycan kənd təsərüfatı nazirliyinin avtomobil nəqliyyatı müəssisində rəhbər vəzifələrdə çalışıb.
Hal-hazırda təqaüdçüdür. Evlidir 2 qızı, bir oğlu var. Fiziki şəxs kimi özəl sektorda fəaliyyət göstərir.
O, həm də istedadlı şair kimi tanınır. “Ömür çiçəyim” və “Ürəyimin səsi” kitablarının müəllifidir. "Borçalı" nəşriyyatı tərəfindən nəfis şəkildə çap olunaraq oxucuların ixtiyarına verilən və “Oğluma nəsihətim” adlanan bu kitab şairin oxucularla üçüncü görüşüdür.
Məhəmmədəli Aranlını ürəkdən təbrik edir, ona uzun ömür, möhkəm cansağlığı, şəxsi həyatında, ictimai fəaliyyətində və bədii yaradıcılığında yeni-yeni uğurlar arzulayırıq!..
Müşfiq BORÇALI.
SÖZ
Cahanda yaşayan iki qüvvə var,
İkisi bir məkanda tutmuşdur qərar.
Birisi bal kimi şirindir desək,
Digəri də zəhər dadar, istəsək.
Hər ikisi canımda tutmuşdur qərar,
Birisi dağ kimi məni ucaldar.
Digəri kül kimi məni alçaldar.
Hər ikisi sözdür ki, lətafəti var,
Sahibsiz olarsa qiymətdən qalar.
Dost seçərkən
O dosta yaxınlıq eyləmə heç vaxt,
Çalış ki, sən ondan olasan uzaq.
O, sənin səhvini demirsə əgər,
O, sənə dost olmaz, olacaq əngəl.
O, kəslə yoldaşlıq eylə ki, hər an,
O, səni heç zaman etməsin peşman.
Söyləsin üzünə hər nöqsanını,
Bəladan ayırsın, sənin canını.
Haqq danışmaq olsun onun adəti,
Belə yoldaşların olmaz qiyməti.
Çəkinmə, heç zaman, dost ol onunla,
Sən sevinəcəksən hər uğurunla.
Çəkin o kəsdən ki, eyləməyir ar,
Hər addım atarkən verməyir qərar,
Ondan kənar dolan, gəzmə heç zaman
Onunla dostluqdan olarsan peşman.
Mənim sözlərimi eşitsən əgər,
Hər vaxt çalacaqsan uğurla zəfər.
(Şairin ömür-gün yoldaşı İradə xanım nəvələri Məhəmməd və Əli ilə)
Şirin nemətdir nəvə
Dünyada bir şirin nemətdir nəvə,
Qəlbində canlanan şöhrətdir nəvə.
Qızıldır, dövlətdir, vardır, bilmirəm,
Onsuz danışmıram, onsuz gülmürəm.
Dəniz tək, dərya tək, cuşa gəlirlər,
Sənə sığınırlar, qəlbə girirlər.
Sevinclərin sənin ilə bölüşürlər,
Dalaşırlar, oynayırlar, gülürlər.
Dərdsiz, qəmsiz, danışırlar dinirlər,
Bu dünyada qayğı nədir anlamaz.
Hey sevinər, o, nahaqdan ağlamaz,
Dərdin-sərin nə olduğun anlamaz.
Ağ vərəqdir, yazilmamış kitabdır,
О qayğıdan, dərddən, sərdən uzaqdır.
Allahın verdiyi bir şirin paydır,
Çalış onun mənliyinə toxunma.
Bu nemətin əvəzi yox dünyada,
Allah onu bəxş etmişdir övlada
Arxanızdır, çagır gəlsin fəryada,
İşlət onu, qızıl kimi, zər kimi.
Gəzsin xan kimi, gəzsin ər kimi.
Bu aləmdə insan kimi tanınsın,
Qayğıya möhtaclar onu çağırsın .
Səndən sonra yaşasınlar adınla,
Ruhun şadlansın hər bir övladınla.
Muəllif huquqları qorunur. Məlumatdan istifadə etdikdə istinad mutləqdir.
